CEBU CITY-Midangop si Rosalia Bornea, usa sa mga residente sa Sitio Anapog, Maracas Brgy. Lahug sa Bombo Radyo Cebu human nga dugay na matud pa silang nag-antos sa kabaho sa hugaw sa tao gikan sa boarding house nga gipanag-iya ni Emilia Bujos anaa nahimutang atbang sa Cosmopolitan sa naasoy nga barangay.
Kini gumikan kay puno na ang septic tank hinungdan nga mag overflow kun adunay mugamit sa pansayan.Matud ni Bornea nga ila na kining gi-reklamo ngadto sa City Health Office gumikan kay giingnan sila sa staff sa barangay hall nga i-diritso didto.
Apan pagsaysay sa reklamante nga igo ra gipa-suyopan ang naasoy nga pansayan ug wala na mu-balik ang taga city health office .Hinungdan nga midangop sila sa Bombo Radyo.
Sa dihang gikab-ot sa Bombo Radyo ang kapitan ug gi-adto ang area, nagkanayon si Kapitan Ging-ging Muaña nga iya kining susihon sanglit unang higayon matud pa kini nga nakadawat siya og sama nga reklamo.
Samtang, kanunay nga abli ang sibyaanan sa habig sa tag-iya sa naasoy nga boarding house ug sa pagsuta kung nahisubay ba sa balaud ang pagdumala niini sa iyang paabangan gumikan kay sigon sa reklamante nga wala matud pa kini ikabayad sa musuyop sa maong hugaw. (LQ)
