Gitabang sa mga sakop sa Cebu City Disaster Risk Reduction and Management Office (CCDRRMO) ang usa ka babae human naligsan sa usa ka multicab pasado alas 6:30 sa gabii, Mayo 12, sa J. Alcantara St. Brgy. Sambag 1, Cebu City
Sa nakuha nga COVID Vaccination Card gikan sa mao nga biktima, aduna kini pangalan nga Nympha Son, 60 anyos, ug taga 72b Katipunan St. Brgy Labangon, Cebu City.
Base sa inisyal nga impormasyon, ang biktima gikataho naglakaw kilid sa dalan sa J. Alcatara St. sa dihang nabanggaan kini og multicab nga miagi sa maong lugar.
Samtang ang driver sa maong multicab, mitaho nga wala siya makabantay sa maong babae tungod sa kasugat kaniya nga naka high beam na sakyanan.
Daling gidala sa Cebu City Medical Center ang maong biktima aron mahatagan og tarong nga atensyong medical.
Samtang ang mga residente nga nanimuyo duol sa lugar nga nahitaboan sa maong insidente, nanawagan sa Brgy. Officials sa Sambag 1 nga unta mabutangan og suga ang maong dapit aron maminusan ang mga aksidente sa lugar
