MANDAUE CITY-Gidakop ang usa ka babaye sa mga jail personnel sa Mandaue City Jail human kini misuway sa pagpalusot og ilegal nga drugas sa pasilidad gahapon, Pebrero 13, 2024.
Giila ang suspek nga si Genalyn Andales Ople, ug residente sa Barangay Canduman sa naasoy nga dakbayan.
Matod pa ni Jail Superintendent Jonathan Bantal, warden sa Mandaue City Jail, nga gitagoan sa suspek ang ilegal nga drugas nga motimbang og duha ka gramos sulod sa condom dayon gisulod sa iyang pribadong lawas ingon man ang usa ka cellular phone ug mga drug paraphernalia lakip na ang mga kontrabando.
Dugang pa nga ang suspek, mobisita sa iyang ka-live partner sulod sa jail facility, kinsa nasikop usab tungod sa kalambigitan sa illegal nga drugas.
Sa pagkakaron, gihikay na ang mga kinahanglang dokumento arun sa pagpasaka og kaso batok kang Ople.
