PROVINCE OF CEBU-Patay ang usa ka 31-anyos nga babaye human nataptan sa usa ka box jellyfish samtang naglangoylangoy sa publikong baybayon sa Barangay Pook, Sta. Fe lungsod, Bantayan Island, Cebu niadtong Domingo, Hunyo 25, 2023.
Gikumpirma sa kagamhanan sa munisipyo ang pagkamatay ni Leslie Ann Madronero, taga Valencia, Bohol.
Sumala sa mga taho, usa ka magtiayon nga parehong mga doktor ug usa ka nars ang mitabang sa biktima ug gidala kini sa tambalanan aron siya makadawat og dugang nga pag-atiman.
Gibutyag sa Municipal Disaster Risk Reduction and Management Office nga adunay hubag ang bahin sa lawas sa babaye nga gituohang tungod sa sakya.
Hinungdan nga nipahimangnu ang mayor sa Sta. Fe nga si Mayor Ithamar Espinosa sa publiko nga mag-amping sa paglangoy tungod sa panahon sa “jellyfish”.
Gitambagan ang mga turista nga dili hilabtan ang jellyfish, ipahilayo kini, ug, kung gikinahanglan, gamitan ug jellyfish repellents.
Kung makasugat sila sa nasangpit nga linalang sa dagat, kinahanglan nga mogawas sila sa tubig ug mangayo og tabang.
Matud pa ni Espinosa nga ang kaluwasan sa mga bisita ug residente maoy hinungdan nga iyang giawhag ang publiko nga sundon ang mga pahimangno aron malikayan ang laing disgrasya.
Gumikan niini, ang mayor nipadangat sa iyang pahasubo ug pag-ampo sa nahibiling pamilya.
