Nakurat ang usa ka babaye sa Ohio, U.S.A. sa pagkadiskobre nga ang karaang painting nga iyang gipalit sa usa ka thrift store sa kantidad nga $2.99 o P170 kay orihinal nga obra sa usa ka sikat nga artista ug gibaligya sa subasta sa kantidad nga $2,875.
Si Marissa Alcorn, usa ka residente sa Dayton, kauban sa iyang pamanhonon sa dihang miadto sila sa usa ka tindahan sa Goodwill human sa panihapon.
Samtang nagsuroy-suroy sa second hand shop, nabantayan niya ang usa ka karaang frame nga bag-o lang gikuha sa usa ka empleyado.
Matud kang Alcorn, dili niya gusto ang painting ug iyaha pa kining gitawag nga ‘ugly’, apan tungod sa barato nga presyo, nakahukom siya nga paliton kini.
Samtang gibutang niya ang painting sa sakyanan, namatikdan niya ang usa ka gamay nga label nga gitaod ubos sa frame nga adunay titulo sa painting ug ang pangalan sa artist niini.
Pag-abot niya sa balay, nangita siya sa internet ug nasurprisa sa pagkahibalo nga ang dibuho maoy sa sikat nga American impressionist nga si Johann Berthelsen.
Gidala niya kini sa Caza Sikes, diin gikumpirma sa mga eksperto nga ang iyang gikuptan mao gayud ang alampat ni Berthelsen.
Ang painting nga gitawag og “Chapel, St. Patrick’s Church” gisubasta ug gibaligya sa kantidad nga $2,875 o naa sa P200,000.
