CEBU CITY — Nagtingkagol sa bilangguan sa Criminal Investigation and Detection Group (CIDG-7) ang usa ka netizen nga matod pa nanghulga batok kang Presidente Rodrigo Duterte pinaagi sa post niini sa facebook account.
Adunay facebook account ang maong suspek nga “Ma. Enirethac Norec” nga adunay post nga di maayo alang sa Pangu sa Pilipinas.
Sa pakighinabi sa Bombo Radyo Cebu kang CIDG-7 Deputy Regional Chief PMaj Ronald Allan Tolosa, gibutyag niini nga pina-agi sa hini-usang pwersa sa CIDG-7, Intelligence Unit og ubang hut-ong sa hanay sa otoridad, nasikop ang suspek nga nailang si Maria Catherine Ceron sa Sitio Tumoy Ibabao Cordova, Cebu kinsa nagpost matod pa sa facebook account niini nga mohatag ang ilang grupo og P75 million ngadto sa makapatay sa Pangulo sa Pilipinas.
Apan depensa matod pa sa suspek nga na-hack ang iyang account og adunay laing nigamit niini.
Matod ni Major Tolosa nga gipalawman na nila ang imbestigasyon kalabot niini og sa korte na magpadayag sa iyang depensa ang suspek.
Samtang lakip usab sa gisuta sa otoridad ang posibleng kalambigitan niining suspek sa mga naunang nadakpan sa otoridad sa kauluhan nga adunay susamang pama-agi sa paghulga sa seguridad ni Pangung Duterte.
Gi-andam na sa CIDG-7 ang tukmang kasong atubangon sa dinakpan.
Samtang panawagan ni Tolosa sa adunay plano nga di maayo sa komunidad nga likayan na kini ilabi na ang makadaot sa Presidente sanglit di kini makatabang sa kasamtangang sitwasyon sa nasod nga lakip sa nag-atubang sa krisis sa coronavirus.
