Babaye sikop human nga gituohang nagsuot og kinawat nga pustiso

UNITED STATES OF AMERICA — Nasikop ang usa ka babaye sa Indiana human nga gituohang nagsuot-suot sa kinawat nga pustiso.

Giila ang dinakpan nga si Joann Childers, hingkod ang pangidaron, ug residente sa maong dapit.

Base sa imbestigasyon sa Jennings County Sheriff Office, midangop sa kapulisan ang usa ka biktima ug iyang gipasanginlan si Childers nga nagdala-dala sa iyang ngipon.

Pagkalabay sa pipila ka mga adlaw, gipatawag sa sheriff ang gituohang suspek sa pagpangawat suot ang pustiso sa babaye.

Matud ni Deputy officer Chris Gholson nga human sa ilang pagsukit-sukit, nabantayan gayud nila gisuot ni Childers ang pustiso sa reklamante.

Nabalhog ang dinakpan sa prisuhan ug mag-atubang og kasong pagpangawat.