Usa ka Japanese macaque nga ginganlag Punch-kun o Punch sa Ichikawa City Zoo ang nag-viral karon tungod sa iyang pagpangga sa orangutan stuffed toy.
Nahibaw-an nga gibiyaan sa iyang inahan ang unggoy nga natawo pito ka buwan ang milabay, busa ang mga zookeeper mihimo dayon og aksyon sa iyang sitwasyon.
Sumala ni Zookeeper Kosuke Shikano nga kasagaran sa mga Japanese baby macaque kay mogakos gihapon sa ilang mga inahan alang sa ilang seguridad ug mga panginahanglan, busa gisugyot nila nga hatagan ang binuhing batang unggoy og stuffed toy.
Gisulayan pa gani sa mga zookeeper ang lainlaing mga kapuli sa stuffed companion sa unggoy, lakip ang mga linukot nga tualya ug uban pang stuffed animals, sa wala pa mopili sa orange ug bug-eyed orangutan nga gibaligya sa usa ka Swedish furniture brand.
Sa video nga mikatap sa social media, kanunay nga makita si Punch nga nagdala sa stuffed toy bisan kung mas dako kini kaysa kaniya, nga nakahatag og kalipay sa mga fans nga moadto sa zoo ug mga netizens nga natandog sa viral video.
Dili kalikayan nga si Punch kay dagmalan sa pipila ka mga hamtong nga unggoy sukad siya gibalhin sa zoo aron makig-uban kanila, apan sumala sa mga zookeeper, kini kabahin sa proseso sa pagkat-on ni Punch uban sa iyang mga kauban.
Samtang, usa ka Swedish furniture brand ang nagdonar usab og mga stuffed toys sa zoo.
