CEBU CITY-Magpabilin sa iyang katungdanan ang labaw sa Cebu City Agriculture Department (CAD) nga si Joelito Baclayon, bisan pa sa panawagan sa Konseho sa Dakbayan nga tangtangon siya.
Kini ang nakab-ot nga hukom ni Mayor Mike Rama human sab niya konsultaha ang 27 ka mga department head sa Kagamhanan sa Dakbayan sa Sugbo.
Hinuon, gimandoan niya si Baclayon nga tubagon ang mga reklamo ni Konsehal Pastor “Jun” Alcover, Jr., nga maoy chairman sa committee on agriculture sa Konseho.
Atol sa iyang privilege speech sa hawanan sa Konseho sa niaging semana, namasangil si Alcover nga “palpak” si Baclayon ug ang tibuok CAD tungod sa kakuwang sa pagpangandam niining batok sa nasinati karon nga huwaw tungod sa El Niño, ilabi na alang sa mga mag-uuma sa kabukiran sa dakbayan.
Kung kahinumduman, gipailawon niadtong Marso 27 sa state of calamity ang 28 ka bukirang mga barangay sa dakbayan tungod sa kadaot nga dala sa El Niño.
Apan gisundan ang maong deklarasyon sa privilege speech ni Alcover sa sunod session sa Konseho kanus-a gipangayo ni Alcover nga pakanaugon si Baclayon sa iyang pwesto, nga gihuptan niini sulod na sa 15 ka mga tuig.
Gumikan sa maong desisyon nasagmuyo si Cebu City Councilor Jun Alcover, ang chairman sa Committee on Agriculture sa pagsupak ni Cebu City Mayor Michael Rama sa pagtangtang kang Joey Baclayon isip pangu sa Cebu City Agriculture.
Matod ni Alcover nga tataw ang mga palpak ni Baclayon ug makahatag usab kini og dili maayong imahe sa mayor.
