Cebu City- Patay ang bago lang nakadaog nga barangay kapitan sa Duljo Fatima nga si Kapitan Ricardo Joel Ycong.
Kini human nga napalgan nalang ang iyang patay nga lawas sulod sa iyang kwarto kaganihang udto diin gidudahan nga gi-atake kini sa kasingkasing.
Basi sa mga silingan, nga sa wala pa namatay ang Kapitan nag-inom pa kini ug nagboodle fight subay na usab sa iyang kadaugan sa nakalabay nga pinili-ay apan matud pa nga gamay ra matud pa ang gikaon.
Nagpasugo pa usab kini og papalit ug tambal nga maintenance sa iyang highblood ug gani ka tulo na kini nga gi-atake.
Una niini, nahibulong nalang matud pa ang pamilya sa kapitan nganu nga wala migawas si kapitan Ycong sa iyang kwarto ug sa dihang gitoktok kini sa iyang anak wala kini mutingog.Hinungdan nga gipugos nalang pag-abli sa iyang anak ang pultahan ug didto nakita nga nag-ubo ang iyang amahan ug nalagom na.
Gisuwayan pa kini og revive sa Emergency Rescue Unit Foundation (ERUF) apan uwahi na kaayo. Si Kapitan Ycong kanhi Konsehal sa Brgy. Duljo ug nagserbisyo sulod sa 3 ka termino ayha siya milansar pagkakapitan.
Sa karon tak-om pa ang pamilya sa kapitan ug padayon pa usab nga gisuta ang tinood nga hinungdan sa kamatayon niini.
