Cebu City– Gipusil patay ang usa ka bag-ohay palang nga na-elect nga barangay councilor sa wala pa mailhi nga mga riding in tandem sa Barangay Pitalo, lungsod sa San Fernando.
Giila ang biktima nga si Dennis Ramos, 43 anyos, negosyante ug residente sa Barangay Bulacao, dakbayan sa Talisay.
Nasayran nga tag-iya ang maong biktima ug usa ka hardware sa maong dapit nga nahitaboan sa krimen. Diin, matud ni PO3 Marju King Mizwari, sa San Fernando Police Station, nga padung na unta kini musulod sa gipanag-iya niini nga edipisyo apan sa kalit lang kini nga gipusil sa mga suspek gamit ang calibre 45 pistol ug dali nga miikyas.
Gumikan niini, gidala sa tambalanan ang biktima apan gideklarar na kini nga dead on arrival. Nakuha sa crime scene ang 7 ka kabhang sa calibre 45. Sa pagkakaron, padayun pa ang imbestigasyon sa kapulisan ug kung unsa ang motibo sa pagpusil patay sa maong bag-ong konsehal.
