Tumong sa bag-ong sistema sa pag-board sa mga pasahero sa Cebu North ug South Bus Terminals aron makab-ot ang hapsay ug organisado nga mga pagbiyahe.
Gipahibalo ni Ahmed Cuizon, ang Administrator sa Cebu North ug South Bus Terminal, nga dili na parehas sa kaniadto nga kinahanglan pang maglinya ang mga pasahero sa mga lingkuranan o mag-iya-iya og dagan ug siksikay inig abot sa bus.
Sa bag-ong sistema, nakabasi na sa ilang ticket number o boarding number ang pagpasakay, dugang pagpasabot niini nga kon ang pasahero naay numero ug tawagon ang sakay para sa numero 1 hangtod 10, makasakay na kini bisan asa pa siya naglingkod o naghulat.
Gipatik usab ni Cuizon nga ang tumong niini mao ang paglikay sa gubot, singitay, ug sapaway sa linya nga kasagaran mahitabo tungod sa kakulang sa disiplina.
Naglaum usab ang pamunoan nga pinaagi sa bag-ong proseso, mas mahimong komportable ug luwas ang kasinatian sa tanang biyahidor sa Sugbo.
