Gikatahong makabatang ang bag-ong gilusad nga pension scheme sa Social Security System (SSS) arun sa pagpausbaw sa pinansyal nga seguridad sa mga Pilipino.
Mao kini ang giingon ni Department of Finance (DOF) Secretary ug SSS Chairperson Ralph Recto.
Asoy niini nga ang MySSS Pension Booster, nga gilusad niadtong Hunyo 10, maoy maghatag sa dalan paingon sa pinansyal nga kagawasan sa matag Filipino nga trabahante.
Diin usa ka retirement savings program nga gilangkuban sa mandatory ug boluntaryong mga pamaagi sama sa Workers’ Investment and Savings Program (WISP) ug WISP Plus, matag usa.
Nagsilbi usab kini nga dugang benepisyo sa binuwan nga pension gikan sa retirement benefit ubos sa regular nga SSS program.
Ang tanang membro sa SSS nga walay final benefit claim sama sa Total Disability, Retirement, ug Death benefit ubos sa Regular SSS Program, ug kansang binuwan nga salary credit (MSC) labaw sa P20,000 kay awtomatik nga ma-enrol sa mandatory savings scheme sa MySSS Pension Booster.
