Nakadayeg ang chairman sa Bagong Alyansang Makabayan Central Visayas sa nahimong pagbasura sa International Criminal Court sa interim release ni Kanhi Presidente Rodrigo Duterte.
Mao kini ang gipaambit ni Jaime Paglinawan atol sa pakighinabi sa Bombo Newsteam diin dako ang iyang pasalamat tungod kay wala matandog ang ICC sa mga ‘drama’ hilabi na ang pagduso og resolusyon nga house arrest sa mga senado sa nasud diin ang gibasehan ang edad ug ang dili maayo nga panglawas.
Busa, nakita niini nga inisyal kini nga kadaugan sa mga Pilipino nga nangita og hustisya.
Samtang, kusganon gihapon nga gibarugan sa lead covenor anti corruption watch nga wala na sila nakurat sa hukom sa ICC trial chamber gumikan sila mismo nasayod nga ang ilang gibuhat kay tataw nga pag-kidnap.
Atol sa pakighinabi sa Bombo Newsteam kang Jun Abenis nga klaro sa ilang habig nga wala’y plano nga buhian international court ang kanhi Presidente tungod sa giingong nagkahiusa ang kasamtangang administrasyon ug ang US nga nagpunting nga pahilumon ang kanhi.
Gisaway usab niini ang pamahayag sa ICC nga mopatay ang 80-anyos kung gani makagawas hilabi na nga aduna kini gahum sa Davao City, apan matud ni Abenis nga mao kini ang pinakadakong botbot gumikan dili na kaya sa kanhi Presidente nga mopatay.
Ingon man nga ang mga Duterte ang gidaog-daog karong panahona ug gusto nga pahilumon tungod sa halapad gihapon nila nga impluwensya sa katawhan.
