CEBU – Dili makalimtan sa usa ka bakasyonista ang iyahang kasinati-an nga naabtan sa magnitude 7 nga linog sa probinsiya sa Abra kaganihang buntag.
Sa pakighinabi sa Bombo Radyo Cebu kang CJ Garcia nga anaa sa Barangay Palao, Bangued, Abra, gibutyag niini nga sa unang tay-og sa yuta nagtuo kini nga usa lang ka dakong truck ang milabay apan iyahang gikahadlok sa dihang nagka-kusog ang paglihok sa kayutaan.
Matud ni Garcia nga igo lang kini nga nagbakasyon sa lugar arun sa pagbisita sa iyahang igsuon apan wala’y swerte nga naabtan sa kusog nga linog.
Giingong unang higayon kini nga nakasinati siya sa maong gikusgon sa linog.
Sa pagsuwat niini nga balita, gipahibalo ni Garcia nga mikabat na sa 20 ka mga aftershocks ang ilahang nasinati human sa magnitude 7 nga linog.
Sa pagkakarun, giingong anaa lang una sila nagpondo sa open area sa bukid, apan adunay pipila ka mga residente ang mibalik na sa ilahang tagsa ka mga panimalay.
