CEBU CITY — Sukad pa niadtong nanglabay nga mga semana, nahimong trending sa internet ug sa mga silingan ang hisgutanan kabahin sa kontrobersyal nga dolomite sands sa Manila Bay.
Adunay usa ka bakeshop sa Cavite ang nipadayag og kasagmuyo sa kontrobersyal nga proyekto sa DENR pinaagi sa ilang “dolomite cake.”
Kung mahulagway, usa kini ka cookies and cream cake nga gipatungan og buttercream frosting.
Adunay mini toy backhoe sa ibabaw ug nakabutang ang pulong nga “It really hurtz. P389M na yon ghorl???”
Kini ang nahimong “witty” nga pamaagi sa maong bakeshop aron ipadayag ang kaguol niini kabahin sa beach nourishment project nga mikabat ngadto sa P389-million.
Apan nagkanayon ang tagtungod sa bakeshop nga igo lang silang namahayag sa makalingaw nga pamaagi.
Nahimong kontrobersyal ang rehabilitasyon sa maong baybayon diin nakuha ang libuan ka toneladang dolomites gikan sa usa ka mining firm sa Alcoy, Cebu.
Sa pagkakaron, nagpaabot pa si Environment Sec. Roy Cimatu sa report gikan sa usa ka mining firm sa Alcoy kabahin sa pag-export sa dolomites ngadto sa kaulohan. (gn)
