Mipasar ang House Committee on Government Enterprises sa House Bill No. 207, usa ka balaodnon nga nagpaubos sa opsyonal nga edad sa pagretiro sa mga trabahante sa gobyerno, lakip ang mga magtutudlo sa pampublikong eskwelahan, ngadto sa 56 gikan sa 60.
Sumala ni House Deputy Minority Leader ug ACT Teachers Party-list Rep. Antonio Tinio, kinsa usa sa mga co-author sa balaodnon, ang pag-apruba sa komite sa balaodnon usa ka importante nga lakang padulong sa mas tawhanon nga polisiya sa pagretiro alang sa mga magtutudlo ug mga empleyado sa gobyerno nga nagpahinungod sa ilang kinabuhi sa serbisyo publiko.
Miingon siya nga ang balaodnon naghatag usab og oportunidad alang sa usa ka tinuod nga pagpili nga moretiro sa edad nga 56 human makasinati og grabeng kakapoy o “burnout” nga gipahinabo sa bug-at nga trabaho.
Giinsistir usab sa magbabalaod nga ang balaodnon mao ang tubag sa dugay nang gipangayo sa mga magtutudlo.
Gipasiugda niya nga ang balaodnon wala magpaubos sa edad sa compulsory retirement, apan nagpalapad sa kapilian alang sa sayo nga pagretiro. Gitugotan niini kadtong gikapoy o “naluya” gikan sa mga dekada nga trabaho nga moretiro og sayo kung gusto nila.
