Giduso karon sa Kagamhanang Lalawigan sa Sugbo ang pagpatukod sa usa ka dedikadong pasilidad nga magsilbing kapuy-an a mga biktima sa violence against women and children (VAWC) sa probinsya.
Ang maong pasilidad kay panganlan og “Balay ni Neneng” matod pa sa nahitabo panagpulong sa Cebu Provincial Committee on Anti-trafficking and Violence Against Women and Children (PCAT-VAWC) niadtong Martes, Marso 3 sa Cebu Capitol.
Ang PCAT-VAWC nag-aprobar sa resolusyon nga mag-realign og budget gikan sa gender-based violence programs ubos sa buhatan sa Provincial Social Welfare and Development Office (PSWDO) aron pundohan ang pagpatukod sa maong pasilidad.
Ang sumbanan sa maong implementasyon kay gikan sa Department of the Interior and Local Government (DILG) Memorandum Circular No. 2024-033. Sumala pa ni DILG Provincial DirectorJesus Robel Sastrillo nga ang pasilidad kay magsilbing one-stop shop sa pagdalit og temporaryong kapuy-an, proteksyon, ug recovery services sa mga biktima sa rape ug uban pang VAWC cases.
Sa susamang panagpulong, gihimug-atan ni Cebu Provincial Governor ug PCAT-VAWC Chairperson Pamela “Pam” Baricuatro ang urgency sa pagsulbang sa kaso sa pagpangabuso sa lalawigan. Gipunting pud niini nga adunay luna nag Kapitolyo nga posibleng lugar sa pagpatukod sa pasilidad.
Samtang sa habig sa Cebu Police Provincial Office (CPPO), gipamahayag ni Police Lt. Ritchil Tesoro, ang hepe sa CPPO women and children’s protection desk nga ang sugyot nga pagpatukod sa maong pasilidad kay makahatag og dakong tampo nilang mga pulis sa ilang mga enforcement operations.
Natakdo sa kasaulogan sa National Women’s Month ang pagsugyot sa maong pasilidad diin ang Provincial Gender and Development Office kay nag-proposed sab og pagmugna sa dedikadong VAWC desk sa Kapitolyo aron sa pagpalapad sa support system sa mga kababaynhan ug kabatan-onan.
