CORDOVA, CEBU-Patay ang usa ka retired Air Force human kini gidunggab sa iyahang kapuyo alas 8:20 sa Miyerkules sa gabii, Agusto 23, 2023 atol sa iyang birthday sa Ajoya Subdivision, Barangay Gabi lungsod sa Cordova probinsya sa Sugbo.
Giila ni Police Major Michael Gingoyon, hepe sa Cordova Police Station ang suspek nga si Jhona Amodia Espinosa, 44-anyos, maoy ka live-in partner sa biktima ug ang biktima nga si Nelson Torres Patalinghug, kanhing sakop sa Air Force .
Matud ni Gingoyon, nga sa wala pa ang naasoy nga insidente magpulihanay lang og report ang duha sa ilahang buhatan sa matag higayun nga mag-away kini, apan magpinasayluay ra kini sa dili magdugay.
Sa pikas bahin sa pakighinabi sa Bombo Radyo Cebu News Team sa suspek nga si Jhona Amodia Espinosa, niangkon kini nga iyahang nadunggaban ang biktima gumikan kay gihapak kini ug bangko sa biktima ug isip pagpanalipod sa iyahang kaugalingun nikuha kini ug kutselyo dayung dunggab.
Apan, giangkon niini nga wala siya magtoo nga sa dughan naigo si Nelson nga nahimong hinungdan sa hinanaling kamatayon niini.
Samtang, kasuko ang nabati sa kabanay ug pamilya sa biktima tungod sa gidangatan ni Nelson, kinsang naligo sa iyahang kaugalingon dugo.
