Gisiguro karon sa Bangko Sentral ng Pilipinas (BSP) Visayas Field Office ang pagpahugot sa Monetary Policy, kung ugaling magpadayun pa ang pagtaas sa inflation rate sa kabisay-an, tungod sa epekto sa gubat sa Middle East.
Sa datos nga gipagawas sa Philippine Statistics Authority Region-7 (PSA-7), nakatala kini og 6.0% inflation report sa Central Visayas sa buwan sa Pebrero ‘rong tuiga.
Gani, gipanglangtawan ang padayong pagsaka niini karong buwan sa Marso, gumikan sa staggered prices sa mga produktong petrolyo sa kasamtangan.
Hinungdan nga nagpadayon karon sa pagmonitor ang BSP sa posibleng epekto sa nagkataas nga presyo sa produktong petrolyo ug ingun man sa nagkagrabeng tensyon sa Middle East.
Subay niini, gihinabi sa Bombo Radyo Cebu newsteam si Dr. Greg Baccay III, ang Head sa Regional Economic Affairs Staff, BSP Visayas Field Office, diin siya mibutyag nga manageable pa sa kasamtangan ang pagtaas sa presyo sa lana apan, posibleng mopadayon ang pagsaka sa inflation rate kung ugaling magpadayon pa ang pagsaka sa presyo sa enerhiya, ug sa mga OFW’s kinsa napiit sa kasamtangang tensyon sa Middle East.
Dugang pasabot ni Baccay, adunay dakong kontribusyon sa remittance sa nasud ang mga OFW, busa kung padayong apektado kini sa tensyon sa Middle East, abli ang posibilidad sa demand sa serbisyo sa matag kantidad sa peso nga naglihok karon sa ekonomiya.
Apan bisan pa niini, gipasalig usab sa maong ahensya nga nagpabiling manageable ra ang inflation outlook.
