CEBU CITY-Mikabat sa P4.4 milyones nga balor sa ilegal nga drugas ang nasakmit sa mga operatiba sa 11 ka police stations sa Cebu City Police Office (CCPO) atol sa unom ka adlaw nga anti-criminality operations gikan Mayo 19-25, 2023.
Gitanggong usab nila ang 107 ka tawo tungod sa illegal nga sugal, 12 ka tawo sa illegal possession of firearms, ug 47 ka mga durugista.
Nasakmit usab nila ang 15 ka mga armas nga walay lisensya ug P6,776 nga bet money.
Samtang 32 ka mga wanted, lakip ang pito sa most wanted list, gitanggong usab sa mga tinugyanan sa balaod sa paggukod sa mga kriminal.
Sa laing bahin, si CCPO Chief Colonel Ireneo Dalogdog niingon nga 40 sa 80 ka police stations sa dakbayan adunay tagsa-tagsa ka polis nga maoy mo-supervise sa mga barangay tanod nga mopahigayon og roaming patrol sa mga sitio.
Matod niya nga ipahigayon karong semanaha ang deployment sa mga pulis sa kabarangayan.
Magsugod sa pagtrabaho ang mga pulis alas 6 sa gabii hangtod alas 6 sa buntag sa sunod nga adlaw.
Katuyuan niini ang pagpakunhod sa krimin sa dakbayan ug ingun man harung dali maka respondi ang sakop sa kapulisan kung adunay insidente nga mo butho sa mga crime prone barangay.
