CEBU CITY — Nagbinayloay sa ilang mga gasa ang Cebu City Government ug ang Spanish Government atol sa makasaysayanong pagdunggo sa barkong Juan Sebastian de Elcano sa Cebu International Port.
Tungod niini, kinasingkasing nga gihangop sa mga Sugbuanon ang Spanish Navy training ship diin gisugat kini og tradisyunal nga Sinulog dance niadtong Sabado, Marso 20 sa kabuntagon.
Atol sa hamubo nga programa, gitunol ni Mayor Edgardo Labella ang replica image sa Magellan’s Cross ngadto nilang Hon. Amaya Fuentes Milani sa Embassy of Spain.
Samtang mihatag usab ang habig sa Spanish Government sa replica image sa maong Spanish Navy ship ngadto ni Labella.
Matud sa speech ni Mayor Edgardo Labella nga nagkahiusa ang publiko aron mahimong kabahin sa maong espesyal nga kasaulugan karong tuiga sama lang sa 500th Year of Christianity sa Pilipinas.
Samtang hilabihan ang pagpasalamat sa deputy head of mission sa Embassy of Spain nga si Milani human nahimong kabahin sa espesyal nga Quincentennial Commemoration sa Pilipinas.
Matud ni Milani nga kinahanglang palig-onon ang kooperasyon tali sa Pilipinas ug Spain pinaagi sa mga infrastructure projects ug uban pa.
Paninguhaon nila kini aron makalingkawas ang nasud sa krisis nga maoy epekto sa COVID-19 pandemic.
Gikalipay usab sa kapitan sa maong barko nga si Capt. Santiago de Colsa ang mamahimong kabahin sa quincentennial commemoration sa Pilipinas pinaagi na sa pagdunggo sa training ship.
Bisan pa man og nahimong luwas ang paglawig niini gikan sa Espanya sukad niadtong Oktubre 2020, nangayo kini og pagsabot sa publiko sa wala una pagnaog sa mga crew members sa maong barko.
Nasayran nga mibisita ang barkong Juan Sebastian de Elcano aron sutaon pagbalik ang nahimong pagbyahe ni Ferdinand Magellan sa nasud isip labing unang circumnavigation sa kalibutan.
Kini subay na usab sa ika-500 nga anibersaryo sa Kristyanismo sa nasud ug ang pagkamadaugon ni Datu Lapu-Lapu sa Mactan Island niadtong 1521.
