CEBU CITY — Gikumpirmar mismo ni Philippine Coast Guard (PCG-7) spokesperson Commodore Alvin Dagalea nga anaa na sa luwas nga kahimtang ang tanang crew lakip na ang kapitan sa M/V Good Fortune human kini nagka-aberya sa kadagatan sa Southern Leyte ug Bohol.
Matud ni Dagalea nga nakadunggo na ang naasoy nga cargo vessel sa Ubay port, Bohol human nga napa-andar og balik sa mga crew ang makina sa barko nga naguba kagahapon.
Nakadesider ang kapitan sa barko nga mopahuway una sa Ubay Port ug i-check ang barko kung aduna bay laing ayuhunon.
Sakay sa maong barko ang 16 ka mga crew members ug aduna kini karga nga 1,600 ka tonelada nga semento diin una kining nilarga niadtong nakalabay nga gabii gikan sa Naga City, Cebu.
Una niini, na-alarma ang mga netizen kagahapon, human usa sa mga miyembro sa mga crew sa M/V Good Fortune ang post social media ang nakipatabang human nga naguba ang makina niini og nasudlan og tubig ang main deck.
Gibutyag ni Dagalea nga daling miresponde ang Coast Guard nga naka station sa probinsya sa Bohol ug luwas nga naka-angkla ang barko sa Lapinig Island ug karon naka dunggo na kini sa Ubay Port.
Gumikan sa maong insidente, mas pahugtan pa sa PCG-7 ang pag-discourage sa barko nga mobiyahe tungod sa bati nga lakat sa kadagatan gumikan na usab sa epekto sa Bagyong Quinta. (gbs/ekp/gn)
