CEBU CITY-Gipaambit sa Basilica Minore del Sto. Niño de Cebu ang ilang kaandam sa pagdagsa sa mga deboto sa Balaang Bata sugod sa unang adlaw sa nobinaryo hangtod na ngadto sa adlaw sa pista senior.
Mao kini ang gipadayag ni Rev. Fr. Jules Van Almerez, ang Basilica Minore del Sto. Niño Media Liaison diin lakip sa ilang gihimo nga pagpangandam kay mao ang pagpanglimpyo sa pilgrim center, pag preparar sa mga lingkuranan ug pag butang og mga LED Screen, ingon man mga speaker sa gawas nga bahin sa simbahan alang sa mga dili makasulod sa Santo Niño.
Diin nakig-alayon ug gihatagan na usab nila og instructions ang mga security personnel nga 5,000 ka mga deboto lang ang makasulod ug kon gani moabot na sa maong ihap kay idili na ang pagpalusot inay mamahimo sila nga motan-aw sa misa pinaagi sa mga LED screen nga gipangbutang sa Plaza Sugbo ug uban pang bahin nga duol sa Simbahan.
Samtang, subling gipahinumduman usab sa Simbahan nga hugot ang ilang pagpatuman sa proper dress code, ingon man gidili ang pagdala sa mga dagkong bag, lakip usab niini ang adunay mga face painting sa lawas o nawong.
Gidili usab ang pagdala og mga camping chairs sulod sa simbahan apan mamahimo ang mga gagmay nga mga plastic nga lingkuranan.
