CEBU CITY-Gipahibalo ni Fr. Aladdin Luzon sa Order of Sain Augustine (OSA) nga ang Basilica Minore Del Sto. Niño dili magpahigayon og misa alang sa publiko.
Kini bisan paman kung napaubos na sa General Community Quarantine (GCQ) ang Cebu City. Pagtataw ni Luzon nga sa unang lagda nga ilang nadawat nangandam na unta ang simbahan human nga gipahibalo nga 10% capacity samga manimbahay ang tugutan kung ipaubos na sa GCQ ang Cebu apan kini nausab matud pa, inay nga 10%, 10 persons ang tugutan. Hayan, aron sa pagsubay sa lagda dili lang una magpahigayon og misa sa publiko ang Basilica.
Dugang pa usab niini nga ang nakalatid sa Executive Order (EO) ni Cebu City Mayor Edgardlo Labella, mao nga sa adlaw nga Dominggo walay tugutan nga makagawas, hayan sa gihapon dili sila makapahigayon og misa.
Apan giklaro usab ni Fr. Luzon nga naa gihapo’y misa online matag alas 8 sa buntag ug alas 2 sa hapon. Subay usab sa subling pag-abli sa Basilica, gipahibalo sa pari nga manira usab ang simbahan matag adlaw nga Dominggo.
Mangabli usab kini alas 6 sa buntag hangtud alas 7 sa gabii matag Lunes ngadto na sa adlaw nga Sabado.
