Nanawagan si Davao City Mayor Baste Duterte sa mga kongresista sa Sugbo nga paminawon ang ilang mga konstituwente sa dili pa mobotar sa pagpa-impeach sa iyang igsuon nga si Bise Presidente Sara Duterte sa ipahigayon nga botasyon nga nagpunting sa pag-aprobar sa impeachment complaint sa plenaryo sa Kongreso.
Matud niini nga kinahanglang paminawon sa mga kongresista hilabi na sa Sugbo, kung unsay baruganan sa mga sugboanon, lakip usab sa iyang mga gihisgutan ang kamahinungdanon sa mga sugboanon nga mibotar ngadto kang kanhi Presidente Rodrigo Duterte, nga maoy nahimong yawi sa kadaugan.
Sigon niini nga nakasabut siya sa mga kongresista nga nahadlok ug nagduha-duha nga mobabag sa impeachment case gumikan kay adunay posibleng mga kiha ang moabut batok kanila sama sa Comelec case o pagpasakag kaso sa mobabag..
Gihimug-atan ni Baste Duterte, nga importante nga barugan sa mga representante ang gusto sa mga Sugboanon gumikan kay matud pa niini wala ra gihapoy mausab sa kinabuhi sa mga tawo hinungdan nga dili kinahanglang isakripisyo ang garbo isip Bisaya.
Dugang niini, nga wala gayuy kahumanan ang pamolitika sa nasud gumikan kay puros lang transaksyon ang gibuhat sa gobyerno.
Sa laing bahin, bisan wala makatambong si Senador Ronald “Bato” dela Rosa sa paglusad sa Reform Alliance for Good Governance and Accountability coalition sa Visayas, nagpadala siya og audio message diin gipahayag sa senador ang iyang suporta sa kampanya sa grupo batok sa korapsyon ug sa posibleng pagdagan ni VP Sara Duterte sa pagka-presidente sa 2028.
Ang mga pahayag ni Dela Rosa migawas taliwala sa nagkadako nga kabalaka bahin sa giingong arrest warrant gikan sa International Criminal Court.
Samtang, masaligon usab si kanhi COMELEC Commissioner Atty. Rowena Guanzon nga ang impeachment complaint batok kang Bise Presidente Sara Duterte sa Senado mas lagmit nga mapakyas kung siya ma-impeach sa Kongreso karong adlawa.
Kini nga pagbutyag gihimo human niya giingon nga masaligon siya nga makakuha og labing menos 300 ka boto gikan sa mga kongresista tungod kay ang mayoriya sa ubos nga balay balauranan nagsuporta sa administrasyon.
