MANDAUE CITY-Naghilak nga nanghinaot ang inahan sa 6-anyos nga batang lalaki nga mahatagan og hustisya ang kamatayon niini human nadat-ugan-patay sa puno-an sa buli sa dalan sa AC Cortes Ave. Brgy. Ibabao Estancia, Mandaue City.
Mao kini ang panawagan ni Angelica Quilaton, inahan ni Christian Quilaton nga namatay gayud human nakaangkon og dakong kadaot ug nabuak ang tuo nga bahin sa ulo hinungdan sa daling kamatayon sa biktima.
Matud pa sa apohan sa bata nga si Siviltar Quilaton, giingong nag duwa ra ang bata sa gawas nga bahin sa karsada, apan sa wala damha kay kalit lang nga natumba ang punoan sa buli ug naatlan nga anaa ang bata sa nahimutangan sa gabok na nga punoan.
Nasayran usab nga sa miaging tuig pa diay adunay request ang pamilya ug mga residente sa naasoy nga dapit nga ipaputol na ang mga gabok nga punoan, gani aduna na kini order sa City Government sa dakbayan sa Mandaue aron putlon ang maong punoan.
Ingon man sa wala pa nahitabo ang disgrasya kay ila na usab kining gipahibalo sa mga otoridad tungod sa kabalaka gumikan kay nagdahirig na ang punoan sa buli.
Samtang, ipasusi sa kadagkuan sa Mandaue City Hall kung unsay mga lakang nga gibuhat ug nganong nalangan ang pagputol bisan paman adunay request letter na nga nadawat.
Hinungdan nga seryosong tutukan niini ang maong kaso.
