CEBU CITY-Gidudahang nalambigit sa walo ka insidente sa pagpamusil sulod sa hurisdiksyon sa Mambaling Police Station, nasikop sa buy-bust operation sa Sitio Badjawan sa Barangay Mambaling.
Giila ang suspek nga si Mark Jedrick Alvarez, 19-anyos, usa ka ex-convict nga taga Duljo Fatima ning dakbayan sa Sugbo, ug nadakpan samtang naghupot og ilegal nga drugas.
Si Alvarez, kinsang gituohang usab nga hitman sa usa ka local drug personality ug gidudahang responsable sa sunod-sunod nga pagpamusil sa Mambaling area.
Mao kini ang giingon ni Pol. Col. Antonietto Cañete, ang acting City Director sa Cebu City Police Office , nga si Alvarez kay niangkon nga nalambigit sa pito ka mga insidente sa pagpamusil sa dakbayan hinungdan nga ang pagkasikop sa suspek dakong tabang sa mga imbestigador sa pagsulbad sa insidente sa pagpamusil.
Gidugang pa ni Cañete nga naila na sa kapolisan ang mastermind, kinsang nagsilbing middleman ug financier nga mo-sampit kang Alvarez aron patyon ang mga mapakyas sa pag-remit sa kita sa ilegal nga drugas.
