TALISAY CITY, CEBU-Nalumos ang 6-anyos nga batang babaye sa Sitio Burlas, Barangay Lagtang sa dakbayan sa Talisay kagahapong adlawa, Martes sa alas 9 sa buntag, Agusto 8, 2023.
Giila ang biktima nga si Irish Mitch Juezan Barral nga nag puyo sa maong lugar.
Sa gipahigayon nga imbistigasyon sa Talisay City Police Station nga gipanguluhan sa hepe nga si Police Lieutenant Colonel Randy Caballes, nga base sa nakuhang impormasyon nila, nasayran nga nangaligo sa sapa ang biktima uban ang iyahang mga kaduwa.
Gihimo ang maong sapa nga ‘quarry site’ sa QM Builders diin adunay mga ‘heavy equipment’ ang nagkalot nga maoy
hinungdan nga nilawon pag-ayo ang sapa.
Matud pa sa mga maguwang sa biktima nga niadto ang bata sa ilalom nga bahin bisan dili kini kaantigo nga molangoy.
Ug nakit-an nalang sa mga bata nga nangaligo, nga kalit lang nga mitidlom sa tubig ang biktima.
Dali nga gi-respondihan sa mga hamtong ang bata apan wala na nila kini nakita tungod sa kalubog sa tubig ug kalalom.
Pipila ka minuto ang nakalabay niusbaw ang lawas sa bata nga wala na’y panimuot ug daling gidala sa Talisay City District Hospital apan gi deklarar na kini nga dead on arrival.
