Napuno sa kasadya ang malampusong pagpahigayon sa “Battle of the Bands” atol sa Handog Pasasalamat ng Bombo Radyo at Star FM sa Sinulog 2020 kagabii sa Plaza Sugbu, sa dakbayan sa Sugbo.
Nakadaug ang bandang Tribu Taguro isip first prize ug makauli sila og P15,000 nga cash.
Nahimong second prize usab ang bandang Landscape PH ug third prize ang bandang Fish Tempo.
Gawas sa mga makalingaw nga performance sa mga banda, daghan usab ang nalipay ug nabulahan tungod sa mga surpresa gikan sa Bombo Radyo ug mga sponsors.
Nasupresa ang pipila sa mga nanan-aw kagabii human makuha ang libre nag t-shirt samtang nakauli usab ang uban og mga instant nga papremyo sa mga paduwa gikan sa Bombo Radyo ug mga sponsors.
Nagpasalamat usab ang Sugbuanong singer/composer nga si Jose LG Fuentes sa mga kababayan tungod sa pagsuporta sa iyang musika.
Kini human nga mihalad og performance ngadto sa mga nanan-aw diin usa sa iyang gikanta mao ang komposisyong “LDR” nga maoy nakapadaug kaniya isip 2nd runner up sa Bombo Music Festival 2020.
Tungod niini, natagbaw ang kadaghanan sa mga supresa ug kalingawan nga gidalit sa Bombo Radyo ug Star FM alang sa tanang mga nagsuporta subay na sa kasaulugan sa Sinulog.
