Misangpot sa komosyon ang protesta sa nagkalaing-laing progresibong grupo Dakbayan sa Sugbo batok sa giplanong pagbisita ni United States President Donald Trump ug sa proposed Pax Silica initiative.
Gipahigayon ang maong protesta kagahapon sa buntag usa ka adlaw sa bisperas sa gikatakdang pag-abot ni Trump sa Pilipinas alang sa ika-49 nga ASEAN Summit.
Gipangulohan sa BAYAN Central Visayas ug ubang sectoral groups ang maong kalihokan nga nagtumong sa pagsupak sa pagbisita ni Trump, pagsalikway sa Pax Silica ug pagpanalipod sa nasudnong soberanya.
Sumala ni Jaime Paglinawan, Chairman sa BAYAN Central Visayas, nagpasalamat siya sa mga estudyanteng migawas sa ilang mga eskwelahan aron ipadayag ang ilang pagsupak sa maong mga isyu, lakip na ang pagbisita ni Trump ug ang Pax Silica initiative.
Gipasabot usab niya nga napadayag sa mga raliyista ang ilang mga testamento ug mga hinaing atol sa maong programa.
Apan sa ulahing bahin sa kalihokan, misaka ang tensiyon human miinterbensiyon ang mga kapulisan sa pagsunog sa gamay nga effigy o piñata nga giandam sa mga raliyista.
Matud ni Paglinawan, aduna na kunoy mga pulis nga nagpundo sa dapit sa PRO-7 Station bisan pa og nagpadayon pa ang programa sa mga grupo.
Tungod niini, nagduda si Paglinawan nga giplano na daan sa kapulisan ang pagdakop sa mga raliyista.
Gipasabot usab niya nga manageable pa unta ang pagsunog sa gamay nga effigy, ilabi na kay nag-andam man kuno ang mga demonstrador og tubig nga gamiton aron mapalong ang kalayo.
Apan matud pa niya, sa dihang milingi siya, nakita na niya ang paghamag sa mga kapulisan ug ang ilang pagsulay sa pagdakop sa mga raliyista.
Nagkanayon si Paglinawan nga unta ang kapulisan mo-respeto sa katungod sa mga lungsoranon sa pagpahigayon og rally sa pagpapaabot sa ilang mga reklamo ngadto sa gobyerno.











