CEBU CITY-Dili tugotan ni Bayawan City, Negros Oriental Mayor Pryde Henry Teves, nga maggamit Og barrier ang mga motorcycle rider sa ilahang lugar.
Gibutyag ni Mayor Teves sa Bombo Radyo Cebu atol sa tulumanong Bombohanay Bigtime nga barugan gayud niini isip usa usab ka motor rider nga dili maayo ang pagbutang ug barrier gumikan kay makamugna lang kini ug disgrasya sa driver ingon man sa sakay niini.
Matud pa nga ang barrier ang maka-apekto sa balanse sa motor diin posibleng mawala ang kontrol sa driver hayan gihimug-atan ni Teves nga dili gayud maayo ang maong lakang nga mugna sa Inter-Agency Task Force (IATF) on COVID-19.
Subay niini, gipahibalo sa mayor nga mipadangat kini ug suwat ngadto sa opisina ni Presidente Rodrigo Duterte diin gi-apelar niini ang maong lakang.
Gituohan ni Mayor Teves nga makasabot ang presidente isip usa usab kini ka rider. Sigon pa sa opisyal nga wala sa posisyon ang IATF sa pag-interbinir sa maong hisgutanan gumikan kay giingong dili man kini mga motorcycle rider hayan wala kini mga kasayoran kalabot niini.
Gipadayag ni Teves nga mamahimo kini nga masuspenso, apan iyaha gayud nga barugan nga dili makasulod sa iyahang lugar ang matang sa kamandoan nga giingong makahatag lang ug kadaut, disgrasya sa iyahang katawhan.
Nagkanayon kini nga sa maong lakang, giingong dili mamatay sa COVID-19 ang driver ug sakay niini, inay mangamatay kini gumikan sa disgrasya. | SBR
