Gipasiugda ni Miss Universe Philippines Bea Millan Windorski ang kamahinungdanon sa sampaguita isip usa ka bililhong simbolo sa kulturang Pilipino ug timaan sa kinasingkasing nga pag-abiabi sa uban.
Alang kaniya, ang nasudnong bulak sa Pilipinas nagdala og lalom nga kasaysayan ug pagbati nga angay ipasigarbo sa matag Pilipino.
Sa usa ka social media post nga inubanan sa mga litrato, gipasabot ni Windorski nga ang pag-abiabi sa usa ka bisita gamit ang sampaguita labaw pa sa yanong pagtanyag og bulak o kuwintas nga bulak.
Kini usa ka pamaagi sa pagpakita sa tiunay nga pagpabili sa kabilin ug tradisyon sa nasod nga nakagamot na sa kinaiya sa mga Pilipino.
Matod pa sa beauty queen, ang maong gamay apan humot nga puting bulak nagsimbolo sa kaputli, pagpaubos, ug lalom nga pagtahod.
Gawas niini, nagrepresentar usab kini sa kainit sa pagbati ug sinseridad sa mga Pilipino sa pagdawat sa mga bisita lokal man o gikan sa laing nasod.
Kini usa ka yano apan makahuluganon nga buhat nga nagpaila sa talagsaong Filipino hospitality ngadto sa tibuok kalibotan.







