CEBU CITY — Gihimong “commitment” o pasalig sa pipila ka mga indibidwal ang paghalad sa ilang dugo pinaagi sa mga bloodletting activities sama lang sa malampusong Dugong Bombo 2019 niadtong Nobyembre 16.
Tungod sa regular nga pagdonate og dugo matag tulo ka buwan, nabantayan nila ang maayong benepisyo sa panglawas.
Usa niini mao ang logistics worker nga si Mark Cuerpo diin walay kulba alang kaniya ang paghalad sa bililhon niining dugo.
Matud ni Cuerpo nga maayo ang pamati sa iyang lawas human niya gihimong habit ang paghatag og dugo sa mga labing nanginahanglan.
Nasayran nga 22 na ka bags sa dugo ang iyang nahatag tungod sa kanunay nga pagsalmot sa mga bloodletting activities sama sa Dugong Bombo.
Samtang wala pa nakasugakod og balatian sa lawas ang laing blood donor sa Dugong Bombo nga si Alejandro Desabilla.
Bisan pa man og nagpangidaron kini og 50 anyos, lagsik gihapon ang gibati ni Desabilla gumikan sa makanunayong paghatag og dugo.
Matud niini nga nakahatag na kini og 23 ka bags sa dugo ug nagsugod kini og donate niadtong 1986.
Dugang pa ni Desabilla nga gipangandaman niya ang pagsalmot sa Dugong Bombo diin nakapahuway kini og ensakto.
Kanunay usab nga andam si Desabilla sa paghatag og dugo human masayran nga adto padung sa mga nanginahanglan ang gidonate niining dugo.
