Gibuak na sa aktres nga si Bianca Umali ang iyahang kahilom human giangkon sa iyang uyab nga si Ruru Madrid nga nag-cheat kini sa ilahang relasyon kaniadto.
Kahinumduman nga gipaambit ni Ruru nga natintal siya sa laing babaye samtang sila pa ni Bianca.
Tungod niini, nagbuwag ang duha ug milungtad og walo ka bulan ang ilang panagbulag.
Giingong nangayo og pasaylo si Ruru kang Bianca, ug gihatagan siya sa aktres og ikaduhang higayon.
Sumala sa aktor, gipamatud-an niya ang iyang gugma kang Bianca ug wala na niya gisubli ang iyang sayop.
Sa usa ka interbyu kang Ogie Diaz, gipangutana si Bianca bahin sa pagkumpisal sa iyang uyab.
Giingon ni Bianca nga gipili niya nga pasayloon si Ruru ug gipasiugda hinuon ang kamahinungdanon sa pagkabuotan ug pagsabot sa giagian sa ubang mga tawo.
Sumala sa aktres, mahimong makasala ang mga tawo, apan importante nga mopili sila nga mahimong mas maayong tawo bisan pa sa mga butang nga ilang naagian.
Giawhag usab niya ang publiko nga dili maghambin og kasuko, ilabina kung adunay nakasala kanila.
Para kang Bianca, importante nga makat-on sa pagpasaylo sa mga tawo nga nakasala ug nakahimo og mga sayop.
