CEBU CITY- Hapsay ug limpyo na ang Billeting area sa Guadalupe Elementary School subay sa ilang pagpangandam sa pag-abot sa mga contingents alang sa Sinulog 2026.
Sa gikabutyag ni Dr. Floreiphine Navarro ang school head sa Guadalupe Elementary School, atol na sa ekslusibong pakighinabi sa Bombo Radyo Cebu newsteam, andam na ang maong tunghaan sa pagdawat sa umaabot nga bisita niini gikan sa Muntinlupa City nga adunay 200 ka nga partisipante ugmang adlawa na, Enero 14, alas 7:00 sa buntag.
Subay niini, gipasalig ni Dr. Navarro nga maka-accomodate ra ang ilahang tunghaan sa gidaghanon sa partisipante, gani aduna silay mapa nga magsibling sumbanan sa mga bisita atol sa ilang pag-istar sa naasoyng pasalidad, ug 28 ka mga lawak nga adunay kaugalingong comfort rooms para sa kinatibuk-ang contingents sa Muntinlupa Performing Arts Guild.
Ingun man nga gipangandaman na usab karon ang pag-abot sa liboan ka mga partisipante ug contingents alang sa nagsingabot nga kalihokan, diin gipahimutang na ang nagkadaiyang tunghaan isip billeting centers.
Sa pagkakaron, anaa na sa Zapatera Elementary School ang mga augmented police personnel, samtang duna na sa y pipila ka mga partisipante gikan sa Bais City ang niabot na sa Labangon Elementary School, diin ang uban kanila gipaabot pa karong adlawa hangtod ugma.
Gikatakda usab ang pag-abot sa mga delegasyon gikan sa Davao karong adlawa sa Tejero Elementary School, samtang ang grupo gikan sa Antipolo Rizal gipaabot nga moabot karong adlawa ug ang kinatibuk-ang 275 ka miyembro sa Enero 15.
Sa umaabot usab nga Enero 14 ug 15, mas modagsa pa ang mga bisita gikan sa Zamboanga City, Davao Occidental, ug Carcar nga mopahimutang sa Tejero National High School, Mabolo National High School, ug Don Vicente Rama MNHS.
Gipaabot usab sa Enero 15 ang mga contingents gikan sa Talon-talon NHS sa Mabolo Elementary School ug ang gikan sa Las Pi as sa Gothong High School, samtang padayon pang gikoordinar ang eksaktong petsa sa pag-abot sa delegasyon sa North Cotabato nga mopahulay sa Ramon Duterte MNHS.
