Gikustodiya na sa Bureau of Internal Revenue (BIR), kauban ang Bureau of Customs (BOC), ang19 ka mga motor vehicles kalabot Discaya tax investigation o ang gitawag nga “Discaya cars.”
Diin kinse sa mga sakyanan nga narehistro sa magtiayong Pacifico F. Discaya II ug Cezarah Rowena Discaya ang gibutang ubos sa constructive distraint.
Samtang, upat ka mga sakyanan ang gibutang ubos sa constructive seizure kalabot sa tax assessment batok sa St. Gerrard Construction General Contractor & Development Corporation.
Gipasabot ni BIR Commissioner Charlito Martin R. Mendoza nga ang katuyoan sa aksyon mao ang pagpreserbar sa mga kabtangan ug pagsiguro sa abilidad sa gobyerno sa pagkolekta og buhis samtang nagsunod sa hustong proseso.
Nagpasalamat usab siya sa BOC sa hapsay nga koordinasyon ug dokumentasyon niini sa proseso.
Mahinumduman nga niadtong 2025, ang BIR nagsang-at og mga kasong kriminal sa buhis batok sa mga Discaya nga adunay kinatibuk-ang utang sa buhis nga P7.18 bilyon.
Kini nga lakang kabahin sa Revenue Collection and Base Protection ubos sa BIR DARES aron masumpo ang paglikay sa buhis ug dili pagbayad niini.
