CEBU CITY — Giklaro ni Dr. Mary Jean Loreche, ang chief pathologist ug tigpamaba sa Department of Health (DOH)-7 nga ang pagpabakuna batok sa Covid-19 dili pasabot nga dili na mataptan sa maong kagaw.
Matud ni Loreche nga kinahanglan gihapon nga magmatngon ug dili magpasagad ang usa ka indibidwal kinsa nga nakadawat na og bakuna gumikan kay aduna gihapoy posibilidad nga mataptan kini pagbalik sa Covid-19.
Dugang pa ni Loreche nga ang tumong lamang sa bakuna mao ang paglikay nga mabutang sa grabe nga sitwasyon ang tawo nga matakbuyan sa maong makamatay nga kagaw.
Samtang dugang nga pagklaro niini nga ang kamatayon sa tulo ka mga indibidwal human nakadawat sa bakuna walay kalabotan sa Covid-19.
Nagkanayon ang doktor nga atol sa pagtuon kauban ang nagkadaiyang espesyalista nasuta nga dili ang Covid-19 vaccine ang hinungdan sa kamatayon sa maong tulo ka mga indibidwal.
Gi-awhag ni Loreche ang publiko nga dili mahadlok nga magpabakuna bisan pa man og adunay mga taho nga nakabsan sa kinabuhi human nga naturokan sa Covid-19.
Hangyo lamang niini sa tanan nga kung adunay gipamati sa lawas sa wala pa kini nabakunahan ingun man human nga mabakunahan nga dili itago og ipahibawo sa health authorities aron makapanagang daan kung angayan ba nga tagaan ug bakuna.
Gibutyag usab sa opisyal nga naa na sa 45,332 ka mga indibidwal ang “fully vaccinated” o ang nakadawat na sa duha ka dose sa Covid-19 vaccine sa Central Visayas. Target matud pa sa ahensya nga mabakunahan ang 70% sa populasyon sa hinapos sa tuig.
Sa laing bahin, uyon si Loreche sa pagsuspenso sa permit sa usa ka club sa Dakbayan sa Sugbo nga nakalapas sa health protocols.
Matud sa opisyal nga ang pagtugot sa mga establishemento nga mag-abli dili pasabot nga dili na mu-obserbar sa mga health and safety protocols. Awhag niini sa publiko nga mahimong responsable aron nga malikayan ang pagkuyanap sa Covid-19.// BRA, BEP
