Mihatag og mubo nga tubag si Bise Presidente Sara Duterte sa Office of the Vice President’s main headquarters sa Mandaluyong karung adlawa Biyernes, Pebrero 7, 2025.
Sa unang mga komento sa publiko sukad sa nahitabo kini nagkanayon nga ‘okay’ ra siya pagkahuman sa iyang impeachment sa House of Representatives.
Dugang pa, nga iyaha kining giila nga mga hagit sa politika nga iyang giatubang, nga nag-ingon, ang bugtong butang nga iyahang masulti niining puntoha mao ang ”God save the Philippines.”
Gipahimuslan usab niya ang higayon sa pagpaabot sa iyang kinasingkasing nga pasalamat ngadto sa iyang mga supporters, nga nagkanayon, nga gusto niyang ipaabot ang iyahang kinasingkasing nga pasalamat sa mga katawhan nga padayong nag-ampo, nagsuporta, misalig ug nagpadayon sa paghigugma kaniya.
Bisan pa sa nagpadayon nga mga proceedings , gipasalig ni Duterte sa publiko sa iyang kaayohan, nga yano nga nag-ingon, “I’m okay.”
Gibutyag ni Duterte nga nagsugod na ang pagpangandam alang sa impeachment niadto pang Nobyembre 2023, subay sa mga taho nga si House Deputy Minority Leader ug ACT Teachers Party List Representative France Castro nagplano nga mopasaka og pormal nga reklamo batok kaniya.
Mao nga Nobyembre sa 2023, adunay mga abogado nga nagbuhat sa ilang trabaho alang sa impeachment, ug kini ilahang itugyan ngadto sa mga abogado.
Ang impeachment sa Bise Presidente, nahitabo niadtong Miyerkules, gibase sa mga alegasyon sa “violation of the constitution, betrayal of public trust, graft and corruption, and other high crimes.”
Human sa impeachment, ang Senado gipaabot nga magpatawag og tribunal aron hukman ang iyang kapalaran.
Kung siya makonbikto, si Duterte mag-atubang sa pagkatangtang sa iyang posisyon ug tibuok kinabuhi nga pagdili sa paghupot sa bisan unsang pampublikong katungdanan.
