Halos gikalingawan sa mga kabatan-onan sa maong nasud ang sobra nga paggamit sa social media, pagtan-aw sa mga videos, pag-chat sa mga friends, ug pagkagumon sa mga online games.
Kini ang nahimong hinungdan diin naka-imbento ang mga tinun-an sa University of Indonesia og device nga gamiton alang sa pagdisiplina sa mga naadik sa internet.
Gitawag kini og “Nettox” o “internet detox” diin suoton kini isip wearable gadget nga sama sa usa ka smartwatch.
Matud sa lead inventor nga si Irfan Budi Satria nga moabot sa tulo ka buwan ang pagtuon aron lang makahimo sa maong wearable nga device.
Pinaagi sa Nettox, sukdon sa device ang hemoglobin oxygen levels ug heart rate variability gamit ang pulse oximeter sensor.
Base sa pagtuon sa American Psychological Association, anaa sa 60 ang HRV sa tawo nga nag-edad og 18 ngadto sa 25.
Kung ubos man ang HRV sa tawo, motingog ang Nettox aron magbutang og timailhan nga kinahanglan nang ipaghuway ang cellphone.
Dugang pa ni Satria nga makatabang ang maong device aron makapahuway ang tawo gikan sa maka-stress nga kalibutan sa internet.
Tinguha usab, matud pa, sa mga imbentor nga magamit ang maong device alang sa mga tawo nga health-conscious. (Gian Navarro)
