CEBU CITY – Gihimakak ni Cebu City Police Office Director Sr/Supt Joel Doria nga gipugngan sa mga lalaki nga nakasibilyan ang mga media nga makaduol sa detention cell ni David Chua Lim, Jr.
Sa pakighinabi sa Bombo Radyo kang Sr/Supt Doria, gibutyag niini nga giingong mga bodyguards ni Lim ang nahisgutang mga lalaki.
Matud pa ni Doria nga wala may problema kung muduol ang mga media sa selda ni Lim.
Sigon pa nga nakaabot ni PRO 7 Police Director C/Supt Noli Taliño ang impormasyon sa nahisgutang presensya sa mga lalaki ug gihatagan siya niini og direktiba nga angayan nga pahugtan ang pagpatuman og oras sa pagbisita.
Subay niini, gimandoan ni Doria ang duha ka mga police officers nga nagbantay sa selda ni Lim nga sundon ang nakalatid nga visiting hours arun nga dili mahisusama sa una nang narelibo niini nga kaubanan.
Dali man usab nga gipapahawa sa area ang duha ka mga giingong bodyguards sa road rage suspect.
Gipasabot ni Doria nga gibawal ang mga bodyguards nga magbantay sa prisohan.
Sa pagkakarun napasa na sa review committee ang kaso ni Lim ug gipaabot na lang nga maaprobahan sa City Prosecutor arun nga masumitir na sa korte.
