CEBU – Human sa iyahang inagurasyon niadtong Huwebes, nipirma si Bohol Governor Aris Aumentado sa iyang unang executive order nga magtukod ug economic recovery task force nga pangunahan sa iyang top appointee.
Sa iyang inaugural nga pakigpulong, nagkanayon si Aumentado nga ang pagpatuman sa mga lakang makatabang sa probinsya nga makabangon gikan sa pandemya ug Bagyong “Odette” nga mao ang unang prayoridad sa iyang administrasyon.
Nalatid sa Executive Order No. 1, nga pangunahan ang Bohol Economic Recovery Task Force (BERTF) ni Provincial Administrator (PA) Aster Caberte isip chairperson.
Langkuban usab kini sa mga department head sa Kapitolyo ug mga representante gikan sa pribadong sektor.
Ubos sa EO, gitahasan ang BERTF sa paghimo og mga konsultasyon sa mga stakeholders ug paghimo og mga action plans nga makatabang sa pagpabuhi sa ekonomiya sa Bohol.
Kini usab ang modumala sa pagpatuman ug pagkompleto sa mga programa.
