Nagbangotan karon ang OPM alternative rock band nga Sleep Alley sa kalit nga pagkamatay sa ilang bokalista ug miyembro nga si Aly Pagaduan.
Sa usa ka pamahayag nga gipagawas sa social media niadtong Hunyo 1, gipaambit sa banda ang masulob-on nga balita ug gihulagway si Aly nga maoy nagsilbing “kasingkasing ug kalag” sa grupo.
Matud sa Sleep Alley, si Aly dili lang usa ka musikero kondili usa ka maayong higala nga naghatag og inspirasyon pinaagi sa iyang talento, pagkamamugnaon, ug grabeng gugma sa musika nga maoy nahuwang sa tinuod nga identidad sa banda.
Bisan og wala gibutyag sa publiko ang hinungdan sa iyang kamatayon, gipahayag sa grupo nga ang handumanan ni Aly magpabilin nga buhi pinaagi sa mga kanta nga ilang namugna ug sa mga kasingkasing sa tawo nga iyang natandog.
Dungan niining masulob-on nga pahayag, gipahibalo usab sa Sleep Alley nga pormal na nilang tapuson ang ilang panaw isip usa ka banda agig pasidungog sa kabilin ug handumanan ni Aly.
Nagpasalamat ang grupo sa tanang fans ug mga tigpaluyo nga nakiabag kanila sa pipila ka tuig nga pagpasundayag.
Sa katapusan, nangayo og pag-ampo ang banda alang sa kabanay ug mga minahal sa kinabuhi ni Aly, uban ang paglaum nga padayon siyang saulogon sa matag higayon nga patingogon ang ilang mga musika.
