CEBU CITY-Hingpit na nga mipasaka sa ilahang counter-affidavit ang duha sa mga Bombo Radyo Cebu anchormen batok sa kaso nga gipasaka ni Mambaling Barangay Kapitan Atty. Gines Abellana.
Gibarugan ni Bombo Marcho Lucabon (Station Manager), ug Bombo Jun Salde (Chief of Anchor), ang ilahang pagtuki sa kamatuoran, sa pagsibya sa mga reklamo sa mga yanong residente sa Barangay Mambaling, subay sa gi-atubang karun nga COVID-19 pandemic.
Kahinumdoman nga gituki sa naasoy nga mga magsisibya ang kontrobersyal nga distribusyon sa senior citizen assistance sa maong barangay kung diin gipagawas kini ug gipatapok sa gym, butang nga gidili subay sa IATF protocols.
Lakip sa gituki sa kahanginan, mao ang distribusyon sa bugas, diin daghan sa mga taga Barangay Mambaling ang mipaabot sa ilahang reklamo.
Subay sa maong hisgutanan, mipasaka ug kasong ‘libel’ si Kapitan Abellana batok sa mga nahisgutang radio anchors, butang nga andam atubangon sa duha.
Hunyo 15, 2020 sa dihang nadawat nila ni Lucabon ug Salde ang subpoena gikan sa korte diin sa petsa 25 sa buwan sa Hunyo, ang ikanapulo nga adlaw nga gitagal arun nga matubag sa duha ang naasoy nga kaso batok kanila. | via SBR
