CEBU CITY– ‘Border pass’ ang angayan matud pa ipanghatag ug dili ang ‘quarantine pass’.
Kini usab ang baruganan sa bise mayor sa Sugbo nga si Michael Rama kung diin gibutyag niini atol sa Bombohanay Bigtime program sa Bombo Radyo Cebu nga dili kinahanglan ang quarantine pass gumikan kay gipaubos naman ang dakbayan sa enhanced community quarantine nga daw sama na sa ‘martial law’–butang nga mao usab ang gusto sa bise mayor.
Gihimug-atan ni Rama nga ang kinahanglan niini karon mao ang usa lang ka mandato sanglit daghan na kaayo ang migawas nga Executive Order (EO) ug naglibog na mismo ang mga barangay.
Hinungdan usab nga mi-awhag si Rama sa city council nga magduso og ‘omnibus ordinance‘ aron nga dunay panagsabot ug hini-usa nga kamanduan.
Dugang pa usab ni Rama nga ang naasoy nga quarantine pass nga gi-agi pa sa city hall ang dugay ug hasol na kaayo sanglit mamahimo raman kini nga himoo’ng sa barangay nalang.
Gihimug-atan usab sa bise mayor nga angayang saligan na karon ang mga barangay kapitan ingon man ang mga konsehal sa barangay aron nga mahapsay ang pagpatuman sa mga lagda.
Awhag usab niini sa katawhan nga mukooperar ug ingon man mag-ampo alang sa kaluwasan sa Sugbo ug sa Sugbuanon.
