Gi-deactivate sa Filipino-American pageant titleholder nga si Brandon Espiritu ang iyang Instagram account human makadawat og grabeng pagsaway sa social media kalabot sa iyang pamahayag bahin sa “halfies” o mga mixed-race nga contestants sa Pilipinas.
Si Espiritu, kinsa nirepresentar sa nasod sa 2024 Mister Supranational pageant didto sa Poland ug nitapos isip second runner-up, nakakuha og dautang reaksyon human niya gitubag ang usa ka netizen nga nangutana kon ngano nga wala siya mokanta og Tagalog sa usa ka video kauban ang laing international candidates.
Sa iyang tubag, siya miingon: “Tell that to all the front runners for the Philippines. This country wouldn’t have a chance on the national stage without us halfies.”
Kini diha-diha dayon nakapukaw sa kilay sa mga fans sa pageant ug negatibo nga mga reaksyon gikan sa publiko, diin daghang mga netizens ang nag-ingon nga nagpakamenos kini sa mga lunsay o bug-os-dugo nga mga Pilipinong contestants, ug naghatag og impresyon nga ang mga mixed-race candidates lamang ang adunay bili sa maong mga kompetisyon.
Taliwala sa maong kontrobersiya, namatikdan sa mga netizen nga mius-os usab ang iyang Instagram followers gikan sa kapin 214,000 ngadto na lang sa 198,000 sa wala pa hingpit nga gi-deactivate ang iyang account.
