CEBU CITY-Gibutyag ni Brgy. Guadalupe Kapitan Michael Gacasan nga wala nakadawat ang iyang barangay sa 1 million pesos financial aid gikan sa Cebu City Government.
Nasayran nga ang Brgy. Guadalupe ang usa sa mga labing dako nga barangay sa Sugbo ug usa ka Sitio niini ang gipaubos usab karon sa granular lockdown.
Sa pakighinabi sa Bombo Radyo Cebu kang Gacasan atol sa tulumanon nga Bombo Barangayan wala kini masayod kung ngano nga wala sila nahatagi sa naasoy nga financial aid sanglit dugay naman kining gihatag niadto pang Hulyo 30.
Dason pas kapitan nga iya lang nga gitutukan karon ang paghatag og ayuda sa mga area o sitio nga adunay mga kaso sa Covid-19. Dugang pa usab niini, wala usab gi-abli ni Gacasan ang iyang mga entry points ug wala sa gihapoy makasulod sa barangay bisan paman sa General Community Quarantine (GCQ) status basin unya matud pa og mukalit na usab og saka ang kaso sa covid.
Gusto matud pa sa kapitan nga kung buhi-on na ang ekonomiya, kinahanglan usab nga pahugtan og istriktohon sa gihapon ang pagpagawas sa mga tao.
Mensahe ni Gacasan sa iyang mga ginsakopan nga dili na magpabadlong ug manggawas bisan ug gidili pa. Kini human nga ubay-ubay usab ang nasikop niini sa ilang barangay nga mga GCQ violators, kinsang gihulagway sa kapitan nga lisod pasabton.
