CENTRAL VISAYAS- Gitudlo isip Regional Director sa Police Regional Office 7 (PRO7) si Brigadier General Redrico Atienza Maranan nga maoy modumala sa rehiyon sa Central Visayas Epektibo gahapong adlawa, Enero 10, 2025.
Si Maranan maoy hulipan ni Brigadier General Jean Fajardo isip regional director sa Central Luzon Police Office.
Uban sa halapad nga kasinatian sa pagpatuman sa balaod ug kaluwasan sa publiko, si Brig.Gen. Maranan, gilauman nga epektibong mangulo sa kapulisan sa rehiyon sa Kabisay-an.
Lumad nga taga Pangasinan, Brig.Gen. Maranan migradwar nga cum laude sa Philippine National Police Academy (PNPA) Class of 1995 nga adunay degree sa Public Safety.
Nagkakuha usab siya og Master’s in Business Administration gikan sa Wesleyan University ug Master’s in Public Management, majoring sa Development and Security, gikan sa Development Academy of the Philippines.
Si Brig.Gen. Maranan nakadawat og daghang mga pasidungog, lakip ang:
- The PNP Heroism Medal
- The PNP Distinguished Service Medal
- Outstanding Alumnus awards from the PNPA
Kini nga mga pag-ila nagpasiugda sa iyang kontribusyon sa kapulisan ug serbisyo publiko.
Isip bag-ong PRO7 commander, si Brig.Gen. Maranan nagtumong sa pagpalambo sa kalinaw ug seguridad sa Central Visayas pinaagi sa pagtutok sa community police, pagpalig-on sa kooperasyon sa mga lokal nga kagamhanan, ug pagsulbad sa ilegal nga drugas ug kriminal nga kalihokan.
Ang iyang pamunoan gilauman nga makatukod og pagsalig tali sa kapolisan ug sa komunidad, ilabi na nga ang iyahang kasinatian ug dedikasyon naghimo kaniya nga usa ka takus nga lider alang sa rehiyon sa Central Visayas.
