CEBU CITY-Mibisita sa Sugbo ang British Ambassador to the Philippines Laure Beaufils, subay sa pagtima-an sa Cebu Press Freedom 2023.
Gibutyag ni Beaufils nga nasubay nila ang pipila ka mga nanimuyo sa United Kingdom kinsang mipahimulos sa pipila ka mga kababayen-an ug kabatan-onan dinhi sa Pilipinas pinaagi sa online sexual abuse ug trafficking.
Tungod niini, ang gobyerno sa UK kay makigtambayayong sa mga otoridad sa Pilipinas arun nga epektibong mahunong ang maong matang sa pagpangabuso.
Gipakita ni Ambassador Beaufils ang hilabihan ka dasig sa pagpakgang sa mga operasyon sa online sexual abuse, exploitation ug trafficking, ingon man nga hugot usab kini nga nakig-alayon sa World Hope.
Dugang ni Beaufils nga usa sa ilahang tinguha nga mahatagan og dugang kasayoran ang media sa Sugbo ilabi na ang mga kababayen-an sa pagpanalipod sa ilahang kaugalingon batok sa sexual harassment ilabi na sa ilahang pagpanarbaho.
Gisiguro usab niini nga nakig-alayon na sila sa gobyerno sa paghatag og suporta sa mga sakop sa media alang sa ilahang kaluwasan, diin mabuhat sa mga tigbalita ang ilahang mga trabaho nga walay kahadlok.
Nagkanayon si Beaufils, nga usa kini ka halapad nga trabaho nga ilahang gibuhat alang sa kagawasan sa pagpanibya ug padayon kini nila nga panalipdan, ingon man ang pagselebrar sa importansya sa ‘community journalism’ arun nga makahatag og impormasyon ngadto sa katawhan sa mga panghitabo sa ilahang tagsa-tagsa ka mga lugar.
