Wala’y lovelife? Bag-o lang gibuwagan? o bitter lang gyud karong Valentine’s Day mga ka-Bombo?
Adunay pakulo ang usa ka zoo sa New York City sa Estados Unidos kun diin pwede kang mupalit og ok-ok (cockroach) nga mamahimo nimong panganlan aron ipadangat imong kasagmuyo sa mga nag-iring-iring karong adlaw sa mga kasing-kasing.
Gi-promote kini sa maong zoo isip fundraiser sa pagsuporta og animal care ug conservation efforts diin welcome ang tanan ma-broken-hearted man, bitter, o mikinsang adunay kalagot sa gugmang ga-aso-aso.
Ang donasyon kay magsugod sa $5 ngadto sa $70 depende sa mapiling package sa mga bisita. Ang mga contributors kay makadawat og digital certificate nga magpamatuod nga adunay basbas sa pagpangalan ang ok-ok nga ilang napilian.
Nagsugod ang maong inisyatiba sa “Name-A-Roach” fundraiser niadtong 2011 nga daling misikat para sa mga bisita nga karon gisuno na sa ubang mga zoos sama sa San Antonio Zoo sa Texas, Birmingham Zoo sa Alabama, ug Brookfield Zoo sa Chicago.
